Glasgow Peggy

Glasgow Peggy

It was a day and a fine summers day
When the Lowlands they were making ready
There I espied a weel far’d lass
She was gaun to Glasgow and they ca’ her Peggy.

It’s up then spak a silly auld man
And O but he spak wondrous poorly
Sayin’ “ye may steal awa my cows and my ewes
But ye’ll never steal away my bonnie Peggy.”

“O haud yer tongue ye silly auld man
For ye hae said enough already
For I’ll never steal awa yer cows and yer ewes
But I’ll steal awa yer bonnie Peggy.”

So he mounted her on a milk white steed
Himsel’ upon a wee grey naigie
And they hae ridden ower hill and dale
And over moors and mosses many.

They rode till they cam to the heid o’ yon glen
It might hae frightened anybody
He said, “whether will ye go, alongst with me
Or will ye return back again to your mammie?”

Their bed was o’ the green, green grass
And their blankets o’ the bracken sae bonnie
And he’s laid his trews beneath their head
And Peggy’s lain doun wi’ her heilan’ laddie.

They lay till it cam to the break o’ day
Then up they rose and made them ready
He said, “whether will ye go, alongst with me
Or will ye return back again to your mammie?”

“I’ll follow you through the frost and snow
I’ll follow you through dangers many
And whether ye go I will go alongst with you
For I’ll never return back again to my mammie”.

“I hae four and twenty gude milk kye
They’re a’ bun’ in yon byre sae bonnie
And I am the Earl o’ the Isle o’ Skye
And why should not Peggy be called a lady.”

“I hae fifty acres of gude land
A’ ploughed ower and sawn sae bonnie
And I am young Donald of the Isle o’ Skye
And wherever I’m laird, I’ll make ye lady.

Collected from Jane Webster 24/8/1892, Crossmichael, first heard at Airds of Kells fifty years before.